10 – Sèmm numm
 

Sèmm numm

A sèrom partì tucc cont i alètt
e dòpo on poeu stracch de acqua e de umid
gh’èmm vorsuu avegh i sciamp et le voilà
ona vòlta levà sù su quei dedrè
se sèmm montà la testa e l’è sta on guaio
tanta per comincià i èmm ciamà pee
dei alter dò savevum nò ‘se fa
Inscì èmm inventà l’uso alternativo
I èmm ciamà man poeu catà sù on baston
gh’èmm dà on bel nom elegant gh’emm dì la clava
e giamò che ghe sèrom giò legnad
a chi ne stàva nò pròppi simpatich
a quei che anmò girava a quater sciamp
e anca a quèi che volàven, ma tròpp bass

podevum contentàss e invece nò
gh’hemm robà la caverna a on ors tranquill
che l’era andaa in letargo e ch’el dormiva
gh’hemm robà la pellizza a lu e anca a l’orsa
con la scusa che tant ormai èren mòrt
fà nient se in verità sèrum staa numm
a copai a legnad, tucc e dò insèma
e che fadìga tiràg via la pellizza
per podè fal n’è toccaa inventà el cortell
de Opinel a quei temp là ghe n’era minga
e n’è toccaa de rangiass ‘na quai manera
cont ona scaia de sèlce bella fina
che la n’aveva giamò tajà el dedrè
quand sèrum setà giò a pensàg a sora

donca ormai l’era fada, la fritada e prònti via
el disaster l’avevum combinà
avevum giamò traa insema tutt ma tutt
quel che de pegg podevum combinà:
sassinament rapina e proprietà
la cà, mader de tucc i condomini,
i armi, la moda, l’arte de dass de fa
e i ròbb, sì, quei peggior, senza vergògna
oramai eren lì basta copià
e a copià el pegg se sa ghe voer nò on genio,
l’è assee vèss ona carògna, on traditor,
e quei nel mond stà cèrt ch’hinn maj mancaa,
El pegg el vegn d’istint ghe voer nagòta
e a miglioral el pegg l’è assee voeurè
basta lassas andà e sarà sù i oeugg
basta lassas andà e sarà sù el coeur.

27 novembre 2020